കാൽനടക്കാരുടെ സുരക്ഷ ലംഘിക്കുന്ന ഡ്രൈവർമാരുടെ ലൈസൻസ് റദ്ദാക്കുമെന്ന് മോട്ടർവാഹന വകുപ്പ്. സീബ്ര ക്രോസിങ്ങിൽ വാഹനം നിർത്തുന്നവരുടെയും പാർക്ക് ചെയ്യുന്നവരുടെയും ലൈസൻസ് റദ്ദാക്കും. 2000 രൂപ പിഴ ഈടാക്കാവുന്ന നിയമനടപടികളും സ്വീകരിക്കും. കാൽനടക്കാർക്കു വേണ്ടിയുള്ള സുരക്ഷാ നിയമങ്ങൾ ലംഘിക്കുന്നവർക്കെതിരെ കർശനനടപടി എടുക്കണമെന്ന ഹൈക്കോടതി നിർദേശ പ്രകാരമാണ് തീരുമാനം. റോഡ് സുരക്ഷയുമായി ബന്ധപ്പെട്ട ഹർജികൾ പരിഗണിക്കവേ ജസ്റ്റിസ് ദേവൻ രാമചന്ദ്രനാണ് നിർദേശങ്ങൾ നൽകിയത്.
സീബ്ര ക്രോസിങ്ങിൽ കാൽനട യാത്രക്കാർക്ക് ആദ്യ പരിഗണന നൽകണമെന്നു കോടതി നിർദേശിച്ചു. ഡ്രൈവർമാർക്കു ബോധവൽക്കരണം നടത്തണം. ഡ്രൈവിങ് ടെസ്റ്റിൽ ഇക്കാര്യവും ഉൾപ്പെടുത്തണം. സമയനിബന്ധനയുണ്ടെന്ന പേരിൽ അമിത വേഗത്തിൽ പാഞ്ഞ് സ്വകാര്യ ബസുകൾക്കും നിയമം ലംഘിക്കാനാവില്ല. സ്വീകരിക്കാവുന്ന നടപടി സംബന്ധിച്ചു വിശദീകരണം നൽകാൻ അധികൃതർക്ക് നിർദേശം നൽകിയ കോടതി ഹർജി ഡിസംബർ 10ന് പരിഗണിക്കാൻ മാറ്റി. ഈ വർഷം ഒക്ടോബർ 31 വരെ സീബ്രാലൈൻ മറികടക്കവേ 218 പേർ വാഹനമിടിച്ചു മരിച്ചെന്ന മാധ്യമ റിപ്പോർട്ടിന്റെയും ഉദ്യോഗസ്ഥരുടെ വിശദീകരണത്തിന്റെയും അടിസ്ഥാനത്തിലാണ് കോടതിയുടെ നിർദേശം. ഓൺലൈനിൽ ഹാജരായിരുന്ന ട്രാഫിക് ആൻഡ് റോഡ് സേഫ്റ്റി മാനേജ്മെന്റ് ഐജി കാളിരാജ് മഹേഷ്കുമാർ, ഗതാഗത കമ്മിഷണർ സി.എച്ച്.നാഗരാജു, പൊതുമരാമത്ത് പ്രിൻസിപ്പൽ സെക്രട്ടറി കെ.ബിജു എന്നിവരിൽ നിന്ന് കോടതി വിവരങ്ങൾ തേടിയിരുന്നു.
സീബ്ര ക്രോസിങ്ങുകളിലുണ്ടാകുന്ന അപകടങ്ങളിൽപ്പെടുന്നത് പകുതിയും മുതിർന്ന പൗരൻമാരാണെന്നും ഐജി വിശദീകരിച്ചു. ബജറ്റിൽ വകയിരുത്തുന്നത് ഉൾപ്പെടെ ആവശ്യമായ നടപടികൾ പരിശോധിക്കുമെന്നു പ്രിൻസിപ്പൽ സെക്രട്ടറി അറിയിച്ചു.
അഭിപ്രായങ്ങളൊന്നുമില്ല:
ഒരു അഭിപ്രായം പോസ്റ്റ് ചെയ്യൂ